الجزء التاسع ..
*** ساكن بعيني خيالك وانت ما تدري .. اني بحـبك اســابق فـيك امالك .. ليت اقدر اوضّح لك بعض امـري .. وارسل حروفي باسـم الحب تهجالك .. يا ليت عينك بصدفه تنظر بشعري .. والا خـيالي يمر في يوم ٍعلى بالك***
فهالليله .. لا غايه و لا العنود قدرن ينامن ..
غايه : عنوده .. نمتي ..؟؟؟..
العنود و هي تفتر صوب غايه : لا .. و انتي ..؟؟؟..
غايه و هي تنسدح على ظهرها : ماياني رقاد ..
العنود : و لا انا ..
افترت غايه صوب منى و منال و لقتهن نايمات : يا حظهن .. نايمات ..
العنود : آاااااه .. ماقالكم مطر متى بيي ..؟؟..
غايه و هي تفتر صوبها : ظنج احمد بي فياه ؟؟..
العنود : غلامين دوم مع بعض .. فأتوقع هيه ..
غايه : يالله يالعنود .. احس عمري بموت .. آاااه .. فديته ..
العنود : غايوه .. عيب عليج .. لا تتفدينه و هو غريب عليج ..
غايه : حرام عليج .. حتى التفدي تبين تحرميني منه ..
العنود : يالله يا غايوووه .. تصدقين اشتقت لمطر ..
فهاللحظه خطر منصور عبال غايه : فقدته ..
العنود : شوووو ؟؟.. يعني بلاج .. شعندج ع مطر ..؟؟!!!..
غايه : لا فديت روحه .. انا اقصد ( و جان تفتر صوب قوم منى .. و قالت بصوت واطي ) .. اقصد منصور ..
نشت العنود و يلست ع الشبريه : .. شو بلاه ..؟؟؟
غايه : عنوده .. نشي لبسي شيلتج بنظهر ..
العنود : شوووو ..؟؟؟.. وين نظهر ..؟؟؟؟!!!!!!..
غايه : ظايجه من الحجره .. نشي بنيلس برى ..
العنود : غايوه .. الساعه 1 اللحين ..
غايه : شوي .. بنيلس عند باب الحجره و بنخلي الباب مفتووح .. دخيييلج ..
العنود : حطي الرحمن في صدرج و استريحي .. يسد هزاب حمد اليوم ..
غايه و هي تنش : اووووه .. برايج انا بنش بروحي .. و نشت غايه .. و كانت فاتحه شعرها .. لبست شيلتها و تحجبت ..
العنود : غايوه .. صاحيه انتي .. عيني خير ..
غايه : نشي ..
العنود : بيهزبونا ..
غايه : محد بيعرف .. بنيلس شوي و بنرد ندخل .. و بنخلي باب الحجره مفتوح ..
العنود و هي تنش من ع الشبريه : عنلالالاتج .. ادريبج ناويه ع قصابنا ..
نشت العنود و لبست شيلتها .. و دخلت شعرها تحت الكندوره .. و فتحن الباب .. و طلعت غايه .. و العنود تمت توايج من ورى الباب اتشوف اذا حد فالممر ..
غايه : يالزيغه ! .. ظهري ما يرزى عليج ..
العنود : و لو ظهر حمد و شافنا ..
غايه : الله يحشرج .. و راحت غايه و يلست ع طرف عدال الباب ..
العنود : حشى .. اتقولين شحاته ..
غايه : تحيدين عمرج يالسباله ..
العنود و هي واقفه فوق راس غايه : اقولج .. لا تحبين ريلي .. يا بنت الحلال لا تحبين ريلي .. خلاص بيلس ..
غايه بنقمه : انا احب ريلج انتي ؟؟!!! .. بتبطين .
العنود و هي تيلس عدال غايه: هههههههههههههههه ..
غايه و هي اتشوف باب حجرة منصور : سبال .. و الله منقهره من تصرفاته ..
العنود : منو ؟؟.. حمد ؟؟؟..
غايه : لا هذا منصور .. امره مصدق عمره .. اوين حلفت .. انزين و العافيه ..
العنود : حرام عليج .. و الله انه ريال محترم و لا قد رفع عينه حتى ..
غايه و هي تفتر صوب العنود : عنيدى .. تعرفين انه تخبرني .. قالي انتي مب العنود ؟؟.. ( و هي تقلد طريقة كلامه )..
العنود و هي مستغربه : حلفي ؟؟؟!!! ..
غايه : و الله .. ايه سودا الويه شو من بينكم .. ؟؟؟؟..
العنود : بن عروه .. مابيني و بينه شي .. حي .. شو من بيننا بعد ..
غايه : عنلاتج .. عيل شعنه تخبرني عنج ؟؟؟..
العنود : شدراني به ..
غايه : ما عليه بخبر مطر باجر ..
العنود : لا حرام عليج .. ايه غايوووه حرام عليج ..
غايه و هي تنزل راسها : حبيني ع راسي ..
العنود : بتبطين ..
غايه : هههههههههههههههههههههه .. عنلاتج ..
فهاللحظه .. خطفن حرمات ..
الحرمه : السلام عليكم ..
العنود و غايه : و عليكم السلام ..
و خطفن الحرمات عنهن ..
العنود : حشى .. وين رايحات اللحين ..؟؟؟..
غايه : اكيد بينزلن الحرم يصلن ..
العنود : اووه شريتلج شيله من حناين ..
غايه : و الله ؟؟.. ما شفتها ..
العنود : ذكريني باجر ارويها لج ..
فهاللحظه .. كان واحد يمشي و في ايده شنطه .. و يطالع ع ارقام الغرف .. بس لفت نظره هالبنتين الي يالسات فالممر عدال باب حجره مفتوح .. و العنود و غايه يالسات يسولفن و لا انتبهن له .. وقف الريال و نزل الشنطه من ايده و تم يطالعهن .. مع ان ملامحهن مب واضحه .. بس كان يشوف شكلهن .. فهاللحظه ظحكت وحده منهن بصوت شوي عالي .. ف ضربتها الثانيه و سمعها تقول : بس فضحينا .. عنلاتج بينشون بسبتج .. جان تحط البنت ايدها ع ثمها و تمت تظحك .. و الريال فاج ثمه و يشوفهن .. ما عرف منو منهن احلا من الثانيه .. بس وحده شوي ضعيفه و الثانيه جسمها شوي مليان .. فهاللحظه افترت غايه صوب الريال .. و شافها و شافته .. جان يبتسم .. صخت غايه من شافته .. و ارتبشت ادور طرف الشيله عشان تتغشى .. و كانت العنود يالس ع طرف شيلة غايه ..
غايه و هي تمط الشيله من تحت العنود : ايه ظكي ..
العنود و هي تسحب شيلة غايه من تحتها : شعندج ..؟؟؟..
غايه و هي تتغشى : ريال جدامج من اصبح يشوفنا ...
جان تفتر العنود لريال الي واقف و يطالعهن و مبتسم ..
العنود و هي تتغشى : فقته و يظحك بعد السبال ..
ظحك الريال و نزل راسه و شل الشنطه و تم يطالع على ارقام الغرف .. و غايه و العنود متغشيات و يطالعنه ..
العنود : حلو نعاله .. اظني من انطونيو ..
غايه و هي ترفع طرف غشوتها عشان اتشوف النعال : لا .. اظني من باشيوتي ..
فهاللحظه وقف الريال جدام حجره .. و هالحجره كانت حجرة منصور .. ثواني و جان يفتر صوب قوم غايه .. و جان يمشي صوبهن ..
العنود و هي تمسك صبع ريل غايه اليمين .. و هن يالسات و متربعات : غايووه لحقي .. يسير صوبنا ..
غايه : ايييه فجي ريلي بشرد ..
العنود و هي تفتر صوب غايه بزيغه : شوووو ..؟؟.. عنلاتج ..
و جان تنش العنود و تربع صوب الباب .. بس غايه .. ما قدرت انها تنش و تربع لانها فاتحه شعرها .. و الشيله مب ساترتنه .. و طالع من تحتها .. نشت غايه و صلبت عمرها .. فهاللحظه كان الريال قريب من غايه ..
الريال و هو يبتسم : السلام عليكم ..
غايه و هي تحاول بايدها اليمين تلم شعرها و تمسكه كله بحيث ما يشوفه و هي تفتر : و عليكم السلام ..
انتبه الريال لايد غايه .. و كان يشوفها و هي تلم اطراف شعرها .. ماشالله مب طول عليه ..
الريال : هذي غرفه 205 ؟؟..
غايه : هيه نعم ..
الريال : و انتي شو تسوين فيها ..؟؟..
غايه بنقمه : شوووووو ..؟؟؟!!! ..
الريال و هو بعده يبتسم : شو تسوين انتي و ربيعتج فالحجره ..؟؟؟..
غايه و هي اتفج شعرها و اتحط ايديها في خاصرتها : و انت شو يخصك ..؟؟؟..
فاللحظه الي فتحت فيها غايه شعرها من بعد ما كانت لاميتنه .. انفتح شعرها .. و طلعت خصله منه .. و كانت فوق ركبتها بشوي .. كأنها حاظنه طرف غايه .. ما قدر الريال يرفع عينه عن هالخصله الي يشوفها ..
غايه : انت شو مشكلتك ..؟؟؟..
الريال و هو بعده مبتسم : هاي الغرفه باسم منصور سيف..
غايه : حي .. منو منصور سيف هذا بعد ..؟؟؟!!!..
و العنود راده الباب و مندسه وراه و تسمعهم ..
العنود بصوت واطي : يالفضايح ..
الريال : هالغرفه باسم منو ..؟؟؟..
غايه : .. مادري .. بس اظني باسم بويه ..
الريال و هو يهز راسه : لا الشيخه هالغرفه باسم منصور ..
العنود من ورى الباب : غايوووه اظني عاني منصور ربيع سعيد ..
جان يفتر الريال صوب العنود الي ما كانت ظاهره .. بس سمعو صوتها و هي ترمس من ورى الباب ..
غايه و هي معصبه : انتي جب ..( و جان تفتر صوب الريال ).. و انت شولك خص هي غرفة منو ؟؟.. وش حايتك فالغرفه .. قلن الغرف ..؟؟!!..
الريال و هو يظحك : ههههههههههههههههههههههههههه .. لا ما قلن ..
غايه و هي تفتر عنه بتدخل الحجره : عيل فارج ..
افترت غايه و لا انتبهت لشعرها من غيضها ع هالريال الي واقف جدامها .. و من شافها و هي تفتر صوب الباب و شعرها من وراها .. ثواني بس .. صخ الريال و هو يشوف مقفاها و هي تمشي .. و من دخلت غايه رقعت بالباب .. جان تفز منال ..
منال : شووو ..؟؟.. شو بلاكن ..؟؟؟..
غايه و هي تهزب العنود : عنلاتج .. خليتيني بروحي عند الريال و ربعتي ..
العنود : زغت منه ..
منال : شوفيكن ..؟؟..
غايه : ماشي .. وانتي دواج عندي .. خليه مطر يظوي ..
العنود : اييييه انا شولي خص ..؟؟..
غايه و هي تعق شيلتها و تنسدح ع الشبريه : .. ماشي ..
و سكتت و تلحفت .. و نامن .. ع الساعه 4:10 دقت عليهن ميثه عشان ينشن لصلاه .. و نشن البنات و تمسحن .. و ظهرن و كانت ام غايه الي تترياهن .. و من عقب نزلن الحرم و صلن .. و من عقب صلاة الصبح .. ردن البنات الفندق و نامن .. و عالساعه 10:30 نشت منى .. و كانن البنات بعدهن نايمات ... راحت و تسبحت و من ظهرت من الحمام لقت العنود واعيه ..
منى : صباح الخير ..
العنود : صباح النور .. متى نشيتي ..؟؟؟..
منى : من شوي ..
نشت العنود و راحت الحمام .. و من عقب ظهرت .. و يلسن شوي اللين ما سحت منى شعرها ..
العنود و هي اتشوف منى و هي اتسحي شعرها : يا حظج ..
منى : ع الشو ..؟؟؟..
العنود : شعرج ..
منى : شعريه ؟؟ !!! ..
العنود : هيه .. قصير .. ما تتلعوزين به ..
منى : هههههههههههههههههه .. من هالناحيه صح .. بس خواني مب عايبنهم كونه قصير .. يعني منال شعرها اطول عن شعري .. يوصل اللين نهاية ظهرها .. و خواني ميتين عليه .. عيل لو شافو شعرج و الا شعر غايه ماشالله .. بيموتون .. هههههههههههههههههههه ..
العنود : افففففففففففففف .. انا اكره الشعر الطويل .. صح شعورتنا طويله بس مب برغبتنا .. بويه الله يرحمه .. كان حالف علينا انا و خواتي ما نقص شعورتنا .. و الا انا ابغض الشعر الطويل .. لعوزه ..
منى : صدقج .. انا ما احب الشعر الطويل .. التعامل مع الشعر القصير اسهل .. و اريح ..
و من بعد ما خلصن البنات نشن و تلبسن شيلهن و تغشن و ظهرن صوب حجرة اماتهن .. و لقنهن حاطات حرارت الريووق ..
و تمن يالسات عندهن .. بس بعدين نشت ام غايه و ام العنود و راحن الجمعيه مع سعيد و يمعه و راشد .. و بو غايه و حمد راحو و لا حد يدريبهم وين راحو .. و تمن امنه و ميثه و العنود و منى و معضد يالسين في حجرة الحرمات و يسولفن ..
فهالوقت نشت منال على رنة تيلفونها .. بس اللين ما نشت كان وقف .. نشت و شافت الرقم .. و كان منصور خوها .. نشت منال و دخلت الحمام بتتسبح .. و كانت غايه بعدها نايمه .. شوي و سمعت حد يدق عالباب .. بس غايه ما نشت .. بس الدق استمر ..
غايه و هي تفر المخده : عنيييييييييييدى و الله بضربج .. و نشت غايه و هي مب لابسه شيله و المخده في ايدها .. و فتحت الباب .. و بدون ما تشوف منو جدامها فرت المخده ..
غايه : فااارجي اريد انام ..
و افترت عنها و ردت صوب الحجره .. بس العنود ما دخلت ..
غايه : عنيدى دخلي و سكري الباب ..
... : بس انا مب عنيدى ..
فزت غايه من يلستها .. ريااااااااااااااااااااال ؟؟!!!!!!...
شوي و ان منال ظاهره من الحمام الي كان بابه يفتح ع الممر الي يودي صوب الحجره .. و من انتبهت غايه ان منال ظاهره من الحمام .. و باب الحجره مفتوح و في ريال برى ..
غايه بزيغه : منال لا تطلعيييين ريال ..
و منال توها فاتحه الباب و ما سمعت الا كلمة ريال : افترت بعينها على باب الحجره المفتوح ..
منال : ليش الباب مفتوح ..؟؟؟..
وما كان في حد عند الباب .. فجأه حد فر المخده على منال ..
منال : ايييييه ... شو هذا ..؟؟؟..
فجأه طاحت عينها ع واحد واقف عند باب الحجره ..
منال بفرحه : حمووووووووود فديت روووحك ..
حامد و هو يظحك : ههههههههههههههههههههه ... لا تطلعين برى ..
منال : فديييييييييييييتك .. دخل .. اوووه لا لا تدخل في بنات فالغرفه ..
و غايه تسمع كلامهم و لا هب فاهمه شي ..
حامد : انزين بدخل هني فهالممر .. ما بدخل الغرفه ..
و دخل حامد ف ممر الغرفه .. اول الممر و كان ظهره للباب من بعد ما سكره.. و من مكانه ما يقدر انه يشوف الي فالحجره .. لانه ممره يفتح فيه باب الحمام و بعدها مسافه و من بعدها يوصلون للحجره ..
منال : متى ييت ..؟؟؟..
حامد : اليوم الصبح ..
منال : اها ..
حامد : وين منى ..؟؟؟.
منال : مادري توني قايمه .. اعتقد فالغرفه الثانيه ..
حامد : اها ... اوكي انا بطلع اللحين و من تخلصين تعاليني في حجرة منصور ..
منال : انشالله ..
و ظهر حامد عنها .. رجعت منال الحجره .. و لقت غايه يالسه ع الشبريه ..
غايه : منو هذا ..؟؟؟..
منال و هي فرحانه : فديته .. هذا حامد خويه ..
غايه : منال فريته ..
منال و هي مستغربه : شوووو ..؟؟؟..
غايه : مادري كنت اتحسبها عنوده .. فتحت الباب و فريتها بالمخده و رجعت و انسدحت ..
منال : ههههههههههههههههههههههههههه .. وانا اقول من وين ياب المخده و فرني بها ..
غايه بخوف : ياويلي لا يكون شافني و انا ظاهرتله بكشتيه .. ( و ربعت و شافت شكلها فالمنظره ).. الساع فلخ الريال جنه شاف شكلي جذيه ..
منال : ههههههههههههههههههههههههههههههههههه .. لا ما ظن شافج .. لانه ماكان واقف عند الباب .. انا لما ظهرت من الحمام ما شفته عند الباب .. شكله كان واقف ع طرف ..
غايه : انا شوفيه حظي عاثر مع خوانج .. لازم اول مره يشوفيني فيها يكون بموقف يفشل ..
منال : ليش شو استوى من بينج و بين منصور ..؟؟..
غايه : بخبرج بس لا تقوليله ..
منال و هي تيلس ع الشبريه و غايه واقفه : لا افا عليج .. سر من بيننا ..
و قالت غايه لمنال عن الموقف الي استوى بينها و بين منصور في ميالس بيت عمها .. و موقفها معاه عند السياره ..
و منال ميته من الفرحه .. لانها تعرف بهالسالفه من قبل .. بس هي فرحانه .. لان هالموقف مع غايه مب مع العنود .. يالله ..
غايه : و اللحين خوج هذا .. فريته بالمخده .. الا اله الا الله .. واحد يشوفنيه و انا مخيسه عمري بالماي من راسي لريولي .. و الثاني يشوفنيه و انا ناشه من الرقاد و كشتيه ناطره و افلخ الي ما يفلخ ..
منال : ههههههههههههههههههههههههههههههههههه ... لا وضع حامد اهون .. مب اكيد انه شافج .. هههههههههههه .. بس منصور .. هههههههههههههههههههههههههههههههههههههههه .. جزاج .. عشان تتعلمين ان ناس غيرج يعيشون فهالدنيا و تسترين عمرج جدام ربج قبل الناس ..
غايه : حرام عليج .. و الله ما كان قصدي ..
منال : ادري ما كان قصدج .. بس انتي تستاثمين ع هالشي الي تسوينه ..
غايه و هي تنش بتروح الحمام : لج مني وعد .. اني احاول اتحاشى هالمواقف .. مع ان و الله العظيم و انا في بيت ربي .. عمري ما سوي موقف بيني و بين واحد و انا متعمده و الله ..
منال و هي تنش بتسحي شعرها : و انا متأكده من هالشي بدون ما تحلفيني حبيبتي ..
و من عقب ما خلصن طلعن و راحن صوب امهاتهن .. بس منال طلعت و راحت صوب حجرة خوانها .. و غايه قالت لمنى الي لحقت منال صوب خوانها ..
منال : بس غريبه .. انت ما قلت انك مسافر المغرب ..؟؟؟..
حامد : كنا بنسافر .. بس عقب كنسلو الشباب .. وصلو البحرين و عيبهم الوضع فقالو بيتمون في البحرين اسبوع و من عقب بيسافرون المغرب ..
منى : و ليش رديت عنهم ..؟؟..
حامد : مادري .. بس قلت .. اييكم احسن .. و سافرت من البحرين صوبكم ..
منصور : انا اشك ان هذا هو الوضع ..
حامد : ههههههههههههههههههههه .. و الله انكم ظالميني ..
منصور : كل شي بيبان في وقته ..
حامد : انتو قولولي شو اخباركم هني ..؟؟..
و تمو يسولفون اللين ما اذن الظهر .. من اذن الاذان ردن حجرتهن و تمسحن و تلبسن عبيهن و نقاباتهن و ظهرن كلهن .. و الكل كان فالممر .. فاللحظه الي طلع فيها منصور من الحجره .. و شاف غايه و هي تتخطاه .. و الباقيات وراها .. من شافها وقف قلبه .. جان ينزل راسه و يوقف ع طرف يتريا حامد يظهر .. و من ظهر حامد .. راحو .. و ع الغدى الرياييل يلسو في حجره و كلو و الحرمات في حجره .. و من عقب ما خلصو .. ك العاده غسلن البنات الوعايين .. و راحن حجرتهن و نامن .. و حامد بما انه ما نام من وصل مكه .. فمن بعد الغدى نام .. ع الساعه 5 العصر .. وصل مطر الفندق .. و العنود مب في حاله .. مرتبشه .. منال و منى .. راحن مع منصور و حامد السوق .. و غايه و العنود راحن عند امهاتهن يترين مطر اييهن .. بس مطر ما ركب فوق .. تلقاله حمد خوه و خذ عنه الشنطه .. و ادى مطر مناسك العمره ..
و تمو يتريونه .. بس مطر ما ياهم الا من بعد الساعه 12 فليل .. و الكل مستهم عليه و اولهم حمد ..
فجأه سمعو دق عالباب .. نش يمعه و فتح الباب .. و سمعو صوت مطر ..
و نشت ام غايه تربع صوبه .. و من شافته ..
ام غايه بخوف : بسم الله عليك .. شو بلالالاك ..؟؟؟.. شو حل فيك ..؟؟..!!!! ..
و من سمعو صوت ام غايه و الخوف فيه .. خافو لا يكون مطر شي فيه .. فالكل نشو صوبه عند الباب ..
و من شافته العنود بغت تموت .. فديته شو فيه .. ؟؟!!..
مطر من شاف العنود ظحك : يا جماعة الخير مافيني الا كل عافيه ..
ام العنود : وين مافيك الا كل عافيه و انت مجبس ع ايدك ..!!!!!!!!..
مطر و هو يطالع العنود من ورى امه : شو اسوي .. مارمت عبعاد العنود .. كنت بنتحر ..
غايه : ما ترزى عليك الا عنيدى ..
مطر : جب انتي ..( و جان يفتر صوب امه ).. كنت بعق بعمري من على برج بينونه .. الا الشباب حلفو عليه .. و انا حالف لا افر بعمري .. و عن حلفتيه ..
و حمد و هو يكمل كلامه : فريت بعمرك من على العرقوب للهور .. هههههههههه ..
مطر : لا .. المسافه عوده من بين راس العرقوب و الهور .. لا .. عن حلفتيه فريت بعمري من على الشبريه .. ههههههههههههههههههههه ..
و العنود اطالعه و ميته عليه .. و هو فرحااااااااااااان بشوفتها .. عنلاتها احلوت هاليومين ..
ام غايه و هي اتيلسه عدالها : فديييتك يا ولديه .. شو الي حل عليك اتفر بعمرك ..؟؟؟..
مطر و هو يشوف العنود و يأشر على ايده :
غرامه بعد قلبي كسر ايديّه .. عقوبة حب و انا بالحب مجنونه
الا وين الذي بيقضي الحيّه .. قبل مافر عمري من فوق بينونه
حمد : الله لا شلك يابوغيث ..
سعيد : لالا .. يوم هذا حالك .. الليله تملج ..
و العنود يالسه و ميته من المستحى ..
غايه : مطوور محد يى معاك ؟؟..
مطر : بن عروه ..
غايه : لا صدق ..
مطر : لا و الله محد .. احمد بغى ايي معايه الا ما رخصوه فالكليه ..
بوغايه : و انت شو حل بيدك ..؟؟..
مطر : الله يسلمك .. اقتحمنا حجره فيها بتان يايين تهريب ..
ام العنود : حزن ..!!... بتااان !!!.. يا ولديه وين ترووملهم البتان.. تخاشعهم .. ؟؟؟؟!!!..
مطر : حليلي ما خاشعت .. طحت عليهم من قبل لا ادخل الحجره حتى ..
سعيد : هههههههههههههههههههههههههههه افا ..
مطر : و الله .. ياخي مندسين في بقعه خامه .. و ظلمي .. و انا متحمس ..
حمد : ههههههههههههههههههههههه .. انزين ..
مطر : حافظ عليّه شال السلاح و متقدمنهم .. و المقدم يقول .. دفعة التدريب فالخلف .. و انا اقوله .. افا عليك مخاوين شما .. انا بقضي الحيـّه عنكم كلكم ..
سعيد : هههههههههههههههههههههههههههه ..
ام غايه : يعني فدى خشمك ..
مطر : ماشي .. من سكت .. ما سمعو الا بغمتيه ..
العنود بخوف : ليييييييش ؟؟!!!..
مطر و هو يفتر صوبها : ذكرت شكلج ..
غايه : هههههههههههههههههههههههههههههه .. ليش لهالدرجه شكلها يخوف ..؟؟؟!!..
و العنود اطالع غايه و الود ودها تضربها ..
مطر : لا و الله .. ما تخرب الساع بنت حمد .. آاااه .. الا ذكرت العنود .. و شلني بها الشوق .. و لا ريت الحفره جدامي .. و جان اطييح فيها ..
حمد : هههههههههههههههههههههههههههههههههههههههههههههههههه ههه ...
سعيد : افا ثرك رخوو ....هههههههههههههههههههههههههههه ..
ام غايه : سلمت يالغالي ..
مطر : حشى مب حفره .. ما تقول الا طوي ..
بوغايه : يوم سلم راسك غنيمه ..
مطر و هو يهز راسه : هيه و الله .. العيوز كنت بموووت ..
ام غايه و هي تلوي عليه : بسم الله من فالك ..
مطر : كنت بموت و انا بعدني ما عرست ..
حمد : هههههههههههههههههههههههههههه .. حشى ياللغثه .. انا اكبر منك ما انلغثت ع العرس شرواك .. !!..
مطر : مشكلتك .. ( و جان يفتر صوب العنود ) .. انا شالني هوى شرجي ..
ام غايه : معضد .. من انرد تيوزهم .. ماروم .. ولديه بينفد ..
بو غايه و هو ينظف المدواخ : جدامه ثنينه من خوانه ما عرسو .. لاحج ع العرس و عوار الراس .. و بنت عمه بتترياه ..
غايه : اصلا العنود قالت اللين ما تخلص دراسه ماتبى عرس ..
و كل ايدها الا مطر و ام غايه ..
مطر : لا ماشي .. انا باقلي كورس و بخلص .. لا ما بتريا .. خييييييييييييبه جنكم بتعلقوني 4 سنين بعدني ..
ام غايه : ما عليك منهم .. ان بغيت الليله بنيوزك ..
مطر: فدييييت هالمنطوق انا .. خشمج خشمج ..
و وايه امه ..
مطر : اللحين وين برقد ..؟؟..
سعيد : فحجرة منصور شبريه فاضيه ..
مطر : منو منصور ؟؟.. ماعرفه ..
سعيد : نش بنسير صوبهم ..
و نش حمد و سعيد و مطر صوب قوم منصور .. و ظهرن العنود و غايه معاهم عشان يرووحن حجرتهن و ينامن .. و من وصلن حجرتهن ..
مطر و هو يسويلهن حركات بعيونه : هذي حجرتكن ..؟؟؟..
غايه : عندنا بنات .. عن اللقافه .. ( و جان تفتح الباب ..و تمط العنود من كتفها ) و انتي دخلي ..
العنود : يالعوافه ..
و دخلن و لقن منال و منى يالسات و يسولفن .. و يلسن شوي و من عقب نامن ..
و في الامارات ..
احمد ميت من هالغايه الي صابه هواها .. في كل لحظه يتذكر .. اعيونها .. اللين اللحين و هو يشوفها و هي عند المطبخ و تفتر .. انا شالله بلاني بها ..
و عبيد .. من خلص دوامه .. رد سويحان .. و مالقى حد فالبيت .. هزاع يالس في بيت عمه .. و يدهم في بيت عمتهم في المرموم .. ما يلس .. رد بوظبي .. و اتصل بمطر .. بس تيلفونه مغلق .. جان يتصل بأحمد ...
أحمد : لا مطر من امس مسافر العمره ..
عبيد : في ذمتك ..؟؟؟!!!!!!!..
احمد : هيه و الله ..
عبيد : افااا .. و لا قالي ..
احمد : انت وين اللحين ..؟؟؟..
عبيد : اسير صوبكم ..
احمد : غايته عيل .. تعال عندنا .. و بتيلس عندي ف نادي الضباط .. دام خوووك خلابنا و سافر دونا ..
عبيد : ما عليك .. بنسافر انا و انت البحرين ..
احمد و هو يفكر بغايه : آااه .. يبالنا و الله نسافر .. نغير جو ..
بعدها بيومين في مكه ..
مطر اندمج مع حامد و منصور وااايد .. و خص حامد لانه من سناه .. و كانت روحاتهم و يياتهم مع بعض ..
العنود : منايه .. تعرفين اني كرهت خوج ..
منى باستغراب : ليش ؟؟!!!...
العنود : من يى مطر و هو عنده .. لاصق فيه .. امره ما ريت مطر الا يوم رد ذيج الليله و من عقبها ماريت ثره ..
منى و هي اتغايضها : استحملي بعده شوي ..
العنود : شووفن .. ترى ان حديتوني .. عادي ارووح ادق عليهم الباب و اقولهم اريد مطر ..
منال : انتي !!.. مستحيل .. اذا غايه ممكن بس انتي لا .. ادريبج خوافه ..
غايه : لا دخيلكن .. انا كل يوم يستويلي موقف يفشل مع خوانكن .. ظهرني بعيد عن ذيج الحجره ..
و تمت غايه اتفكر في احمد .. يالله كان يريد ايي .. معقوله احمد يحس بلي احسبه .. معقوله يميل لي .. غمضت اعيونها تتذكر شكل احمد و هو منسدح ع الكرسي في ميالسهم .. آاااه .. (اتمنى قربك ولكن كيف يا عـمري .. ما تـدري عني ولا ادري باحـوالك .. اتعبني قلبي وصبري يشتكي صبري .. يا ليت عيني تشوفك واتّشكّى لك.. ساكن بقلبي وعيني وانت ما تدري .. انك حبيبي وساكن قلبي إلحالك ) ..
فنفس اليوم .. كان مطر عازمنهن ع العشى برى .. بس الحرمات ما طاعن ..
مطر : خلاص عيل .. لا تطبخن بيبلكم العشى من المطعم ..
ام غايه : عيشتهم سقم ..
ام العنود : لا لا .. انتي فالسعوديه .. عيشتهم غير ..
ام غايه : ظنج ؟؟..
ام العنود : هيه ..
مطر : الشيبه .. بشور عليكم بشور ..
بو غايه و هو منسدح و يعابل المدواخ : عطنا ..
مطر : دام انكم اعتمرتو ... و قضيتو وقتكم في مكه .. شرايكم نروح أبها .؟؟.
بوغايه : وين أبها ..؟؟؟..
مطر : بويه هذي دار .. فالسعوديه .. ماتقول الا جنه من حلاتها .. و مطرها صبيب ليلهم و نهارهم ..
ام غايه : اسميك .. بو الظاوايا .. وين بتفرنا ؟؟!..
مطر : و الله يا انج ان طحتيها مره .. لتتعذرين منها ...
بوغايه و هو يصلب عمره : يعله في ذمتك .. ؟؟..
مطر : و الله ..
ام غايه : لالالا سلامتكم .. ورانا الحلال و البيت يصفر محد فيه .. و شيبتنا فارينه عند اليازيه ..
مطر : برايكم عيل .. احنا الشباب عندنا اجازه الاسبوع الياي .. و انتو ع حجزكم ورى باجر بتردون البلاد .. خلاص ردو دونا .. و احنا بنرووح ابها ..
بوغايه : لا انا بخاويكم ..
ام غايه : ويدي بالستر .. وين بتخاويهم .. و بتخلونا حرمات بروسنا نرد ..!! ..
بو غايه : شو تبيني اسويبج ... بحووط و بفجج راسي انا ..
ام غايه : ما جنعت عينك من الحواطه .. جنك ما خليت دار ما شفتها و بعدك تبى تحوط ..
بوغايه : ما عليك من هالعيوز .. بنخاويكم ..
مطر : انتو شوفو وضعكم و قولولنا .. عشان نرتب وضعنا احنا بعد ..
و اللين فليل و هم يناقشون رووحت أبها .. الكل موافق الا ام العنود و ام غايه و ميثه ..
غايه : حرام عليكن .. لا تخربن علينا ..
ميثه : لا .. ماظن احمد بيرخصني ..
غايه : قولي تبين تردين لريلج ..
ميثه : هيه و الله اريد اردله .. غايوه البيت محد فيه ..
العنود : حرااام عليكم .. عمي .. رمس قولهن شي ..
بو غايه : مالي خص بكن .. انا بخاوي الشباب .. و هالعيايز في حلجكن ..
غايه : امايه مب عيوز .. فدييييييييييييتها .. شيخة البنات ..
ام غايه : لا و الله مب عيايز .. بعدنا بنات ما تخطينا الثلاثين ..
بوغايه : لو انتن بنات ما تخطيتن الثلاثين .. جان اول من عزمبنا انتن .. الا انتن عيايز داقات الستين ..
ام العنود : لا و الله .. بعدنا متناصفات فالعمر .. و جنه ع الروحه .. امره ما يخالف علينا ..
ام غايه : هيه نعم .. و بنشوف منو باجر بيتشكى من ظهره ..
بوغايه و هو يغمز لغايه : ما عليه بنشووف ..
غايه : يعني بنرووووح ..؟؟؟..
ام غايه و هي تأشر بيدها : هيه نعم بنرووح و بنفجج روسنا ..
فنفس اليوم .. كانو الشباب متيمعين في حجرة منصور بيتعشون فيها .. و البنات في حجرة امهاتهن ك العاده ..
و الكل يالس و فرحان و يرتبون لروحتهم لأبها ورى باجر ..
ام غايه : غايه .. كم رقم عمتج اليازيه ..؟؟؟..
ميثه : عمتيه تبين رقم امايه ..؟؟؟..
ام غايه : هيه بنتصلبها انشوف الحال عليهم ..
و عطتها ميثه رقم امها و الي هي فالاصل عمة غايه ..
ام غايه : الغوي .. عمتج تقولج .. باجر بيظهرن اسماء القبول فالجامعه ..
غايه : و الله ..؟؟؟..
ام غايه : و الله .. اتقولي الكليه ظهرن .. باقي الجامعه ..
غايه : عيل بتصل بشموس ..
و خذت تيلفون امها و اتصلت على بيت قوم شمسه الا محد شله ..
غايه : بتصلبها ع تيلفون امها ..
و يلست ادور تيلفونها عشان اتظهر منه الرقم .. بس ما لقته ..
غايه : اوووه تيلفوني فالحجره ..
ام العنود : من عقب ما تتعشين هاتيه .. و اتصليبها ..
غايه : لا اللحين باييبه و بتصلبها ..
و نشت غايه و ظهرت من الحجره .. و راحت صوب حجرهن و توها عند الباب .. و سمعت واحد ..
.. : الشيخه ..
جان تتغشى غايه و تفتر صوبه .. هي عرفته من قبل ما تشوفه ..
و كانت اول مره منصور ما ينزل عينه من على غايه ..
منصور : السموحه منج ..
غايه و هي تتنافض بطرقه مب طبيعيه : بالحل الشيخ ..
منصور و هو يمسك طربوشته بايده : كنت اريد منال .. من الصبح اتصلبها الا ما تشل التيلفون ..
و غايه عينها على ايده و هي تلعب بالطربوشه .. عيبنها صبوعه ..
غايه و هي مرتبكه : مادري ..
منصور : ماعليج اماره الشيخه .. الا ممكن تزقرينها شوي ..؟؟؟..
غايه : لا هي مب فالحجره .. (و جان تأشر بيدها صوب حجرة امهاتها ).. هي فالحجره الثانيه ..
منصور و هو يبتسم لغايه : خلاص .. من تشوفينها خليها تتصلبي ..
غايه و قلبها يدق بالقو : انشالله ..
خطف منصور عنها .. بس غايه تمت شوي .. مب قادره تمشي .. جان تفتر و تفتح الباب ..
و سمعت منصور يقوله : السموحه منج الشيخه .. الا .. ما تامرينا بشي .. ؟؟..
غايه و هي بعدها عاطيه ظهرها لمنصور : سلامت راسك الشيخ ..
منصور : ربي يسلم روحج ..
و راح عنها .. و دخلت غايه الحجره بسرعه .. و سندت ظهرها ع الباب من بعد ما سكرته .. آاااه .. شو فيه قلبي يدق بهالطريقه !!! .. و تمت تتنفس بصوت مسموع .. تريد اتشتت افكارها .. و تخفف من دقات قلبها .. تمت غايه فالحجره يالسه ع الشبريه حول 10 دقايق تريد تستوعب الوضع الي هي فيه .. يالله .. و من بعد ما حست ان دقات قلبها خفت شوي .. شلت تيلفونها من على الجرج .. و تغشت و طلعت من حجرتها .. فهاللحظه شافت مطر خوها و هو واقف عند واحد عند باب حجرة منصور .. و الي صدمها ان هالواحد هو نفسه راعي الشنطه الي تواجعت معاه ذيج الليله .. منو هذا ؟؟؟..
فهاللحظه افتر مطر و الريال صوب غايه .. و شكله الريال عرفها .. هي نفسها بعظمتها بوقفتها هذي ..
مطر : برايك عيل حامد .. برووح صوب ختيه بعطيها العشى ..
حامد : خلاص بنترياك ..
مطر : اوجيه ..
و راح مطر صوب غايه ..
و وايها ..
مطر : مرحبا السااع بغرشوبتنا ..
غايه و هي مرتبكه : اهليييييييين .. شو يبت العشى ؟؟..
مطر : هيه .. اندوج شليه صوب الحرمات ..
غايه و هي تتناول الاكياس من عند مطر : انشالله .. الا مطر ..
مطر : لبيه ..
غايه : لبيت في منى .. منو هذا الي امبونه واقف عندك ..؟؟؟..
مطر : هذا حامد خو منصور ..
غايه : اها ..
و سكتت عنه .. و راحت و شلت العشى صوب امهاتها .. فذيج الليله فليل خبرت غايه العنود .. عن حامد ..
العنود : مستحيييل .. !!!
غايه : و الله انه هو .. مب غتيره عن شكله ..
العنود : و شو قلتي لمطر ..؟؟؟!!!..
غايه : شو بقوله بعد ..!.. ما قلتله شي ..
العنود : الله يستر علينا ..
غايه : يالله امييييييييييييين ..
و نامن ..بالباجر من عقب الغدى فالسعوديه .. يلسو الشباب في حجرة منصور يرتبون وضع رحلتهم باجر لأبها .. و اتصل مطر بغايه و طلب منها تسويلهم دلة جاهي .. نشت غايه و راحت صوب حجرة امهاتها بحكم انها الحجره الوحيده الي فيها مطبخ .. و سوتلهم الشاهي ..
ام غايه و هي منسدحه : حطيلهم نعناع .. خوانج يحبونه بالنعناع ..
غايه : جاد الباقين مابغونه النعناع ..
ام العنود : حطيه فطرف الصنيه .. و الي يبى بيحط لعمره .. لا تعبلين ع عمرج و خلاف يذمونه ..
ظهرت غايه من حجرة امهاتها بالصنيه .. و تيلفونها بطاقه مدفوعه فالخارج تستقبل بس ما ترسل .. فما تقدر تتصل بتيلفونها لمطر .. و هي قد وصلت باب حجرة منصور .. و في نفس الوقت متعايزه ترد حجرة امهاتها تطلب تيلفوناتهن .. و مستحيه تطلب تيلفون منال .. خلاص بحطه عند الباب و بدق الباب و بربع .. و توها موخيه بالصنيه تحت الباب و الا الباب انفتح .. و غايه موخيه .. و لاشافت الا نعال الريال و ريوله .. ياويلي ..
مممممممممممم ..
ظنكم منو هذا الي ظهر ..؟؟؟..
و ظنكم .. معقوله .. حامد يحب غايه ..؟؟؟؟...
و غايه .. ليش قلبها دق بذيج الطريقه و هي اتكلم منصور ..؟؟؟..
و حامد و المواقف الي استوت من بينه و بين غايه .. معقوله ما تتحول لحب .. و لا تتحول لكره ..؟؟؟..!
و رووحتهم لأبها .. شووو ممكن يستوي فيها ....؟؟؟؟..
و ظنكم .. مب يمكن احمد يلحقهم هو و عبيد لأبها ..؟؟؟..
و مطر و العنود .. شو بيستوي من بينهم ..؟؟..
