خذيت من روحي لروحـي فوايـد
ثـلاث جـزلات شـويٍ عددهـا
الاولـه حبـي دخـول المساجـد
والبعد عن من طاعـة الله فقدهـا
والثانيـة حبـي لحفـظ العوايـد
والبعد عن نـاسٍ كثيـر حسدهـا
والثالثـة حبـي لنظـم القصايـد
لامرت الرجـل الحميـد يحمدهـا
وزودتها من روح روحي زوايـد
الـوذ فيهـا لا بليـت بنكـدهـا
احـب رجـلٍ بالمهمـات كـايـد
لا قلت له ذيـك المهمـة قصدهـا
لاجا نهـارٍ فيـه ناقـص وزايـد
يحلهـا لـو كثـروا فـي عقدهـا
وأحـب زينـات البكـار النوايـد
علط الرقاب اليـا توفـر سعدهـا
خطو الفتاة اللي ظهرهـا امتعايـد
لا اوحت ضباب الوِرد نارت وحدها
صفراً عليها من وبرهـا شرايـد
مثل الهنوف اللي تنقـض جعدهـا
تلعب نهار العيـد والعيـد عايـد
بين الصفوف بخيزرانـن بيدهـا
تنقض جديل الرأس فوق القلايـد
وتشوف من حبه بداخـل جسدهـا
لاضاق صدري والليالـي شدايـد
نصيت لي صفـراً تـدرج ولدهـا
صفـراً لبنهـا للنشامـى برايـد
في دكةٍ من جاء ييبيهـا وجدهـا
وأحب ممشاً بين هـدب الجرايـد
غيـدٍ ثمرهـا نادرٍفـي بلـدهـا
وأحب ممشـاً بالفيـاض الجدايـد
بين البيوت اللـي رفـاع عمدهـا
وأحب اخيـل مرزمـات الرعايـد
دعم السحاب اللي ثقيـل رعدهـا
تضفي علـى دار تضـم البدايـد
يرتاح بالـي لا مشيـت برثدهـا
برفقـه مشاكيـل وسـاع البنايـد
شقر الحرار اللي ينومس هددهـا
هذا هـواي وباقـي العمـر بايـد
ولا دامت الدنيا لمنهـو رصدهـا
,,*,,
الشاعر / عبد الهادي بن راجس
رحمه الله
